काठमाडौँ । पूर्व राजा ज्ञानेन्द्र शाह कोरोना भाइरस (कोभिड–१९) संक्रमणमुक्त भएका छन् । थापाथलीस्थित नर्भिक अस्पतालमा उपचाररत उनी कोरोना संक्रमणमुक्त भएका हुन् । अस्पतालले मंगलबार विज्ञप्ति जारी गर्दै पूर्व राजा कोरोना मुक्त भएको जनाएको छ ।

दुई दिनअघि पुनः स्वाब परीक्षण गरिएको र त्यसको रिपोर्ट नेगेटिभ आएको अस्पताले जारी विज्ञप्तिमा उल्लेख गरिएको छ । पूर्व अधिराजकुमारी प्रेरणा शाहको कोरोना रिपोर्ट यसअघि नै नेगेटिभ आइसकेको अस्पतालले जनाएको छ ।

यस्तै, कोरोना संक्रमण भई १८ दिनअघि नर्भिकमा भर्ना भएकी पूर्व रानी कोमल शाहलाई प्लाज्मा थेरापी विधिबाट उपचार थालिएको थियो । उनको अवस्थामा सुधार भएपछि हाल वार्डमा उपचार जारी राखिएको अस्पतालले जनाएको छ ।

पछिल्लो समय उनलाई दिँदै आएको अक्सिजनको मात्रा समेत घटाउँदै लगिएको छ । उनको अवस्थामा दैनिक र क्रमिक सुधार भइरहेको अस्पतालले जनाएको छ ।