काठमाडौं । नेपाल शिक्षक महासंघले दोस्रो चरणको आन्दोलका कार्यक्रम सार्वजनिक गरेको छ । आन्दोलनका कार्यक्रम जेठ ५ गतेदेखि सुरु हुने महासंघले जनाएको छ । जेठ ५ गते नेपाल शिक्षक महासंघको मागबारे प्रधानमन्त्री, सभामुख, शिक्षा, विज्ञान तथा प्रविधि मन्त्री र अर्थमन्त्रीलाई खुलापत्र पठाएर ध्यानाकर्षण गराउने जनाएको छ ।

खुलापत्र हरेक शिक्षक कर्मचारीले पाँच गते आफ्नो फेसबुक वालमा शेयर गर्नुपर्ने छ । नेपाल शिक्षक महासंघको सुचना अनुसार जेठ ७ गते हरेक शिक्षक तथा कर्मचारीले शिक्षा, विज्ञान तथा प्रविधि मन्त्री र अर्थमन्त्रीको मोबाइल नम्बरमा शिक्षक तथा विद्यालय कर्मचारीलाई अविलम्ब कोभिड बिरुद्धको खोप दिइयोस्, बालकक्षाका शिक्षक र विद्यालय कर्मचारीको तलव बृद्धि गरियोस् भन्ने नारा पठाउनु पर्ने छ ।

महासंघका महासचिव लक्ष्मीकिशोर सुवेदी र सहअध्यक्ष पूर्णप्रसाद दवाडीले कार्यक्रमको तालिका सार्वजनिक गर्दै जेठ ९ गते संसदमा प्रतिनिधित्व गर्ने राजनैतिक पार्टीका संसदीय दलका सचेतक तथा महासंघबीच महासंघबाट पेश भएका माग र समसामयिक विषयमा अनलाइन अन्तरक्रिया तथा छलफल गर्ने बताए । जेठ ११ गते हरेक शिक्षक तथा शिक्षक महासंघले कालो स्टिकरमा राखिएका ६ वटा हाइलाइटेड माग लेखी छातीमा टाँस्ने र टाउकोमा कालोपट्टी बाँधेर फोटो खिचि उक्त फोटो फेसबुक वालमा पोस्ट गर्ने महासंघले सार्वजनिक गरेको सूचनामा जनाएको छ ।

जेठ १३ गते हरेक शिक्षक तथा कर्मचारीले नेपाल शिक्षक महासंघले शिक्षा, विज्ञान तथा प्रविधि मन्त्री समक्ष पेश गरेको विरोधपत्र, मागपत्र र सम्झौतापत्रका छायाँप्रति आफू रहेको निवार्चन क्षेत्र भित्रका संघीय तथा प्रदेश सभाका सांसदहरुको इमेल तथा फेसबुकको म्यासेज बक्समा पठाउने कार्यक्रम रहेको छ । महासंघका माग पुरा नभएमा जेष्ठ १८ गते तेस्रो चरणको कार्यक्रम सार्वजनिक गरिने महासंघले जनाएको छ ।