काठमाडौँ । नेपाली कांग्रेसको संसदीय दलका प्रमुख सचेतक बालकृष्ण खाणले स्वास्थ्य तथा जनसंख्या मन्त्री हृदयेश त्रिपाठीलाई फोन गरी कोरोना भाइरस (कोभिड १९)बारे जानकारी लिएका छन् । उनले सरकारले कोभिड १९ रोकथाम, न्युनीकरण तथा उपचारबारे मन्त्री त्रिपाठीलाई फोन गरी जानकारी लिएका हुन् ।

यस्तै सचेतक खाणले नागरिकको जीवन रक्षा गर्न सरकारले आफ्नो दायित्व पूरा गर्नु पर्ने धारणा राखेका थिए । साथै उनले विदेशबाट खोप आयात गर्नु पर्नेबारेमा ध्यानाकर्षण गराएका थिए ।

त्यसैगरी सचेतक खाणले देशभर अक्सिजनको अभावमा संक्रमितले अकालमा ज्यान गुमाउनु परिरहेको मन्त्रीलाई स्मरण गराएका थिए । उनले अस्पतालमा अक्सिजनको अभाव हुन नदिन अक्सिजन सिलिण्डर आयात गर्ने र उत्पादक कम्पनीसँग सहजीकरण गर्न अनुरोध गरेका थिए ।

उनले सरकारले आवश्यक पर्ने स्वास्थ्य सामग्री तथा उपकरण विदेशबाट ढुवानी गर्न प्रबन्ध गरी सहजीकरण गर्नु पर्नेमा जोड दिए ।