काठमाडौँ। नेकपा एमालेको सुदूरपश्चिम प्रदेश कमिटीले सुदूरपश्चिम प्रदेश सरकारका नवनियुक्त मन्त्री र राज्यमन्त्रीलाई स्पष्टीकरण सोधेको छ । एमाले सुदूरपश्चिम प्रदेश अध्यक्ष कर्ण थापा र सचिव राजेन्द्र रावलले आन्तरिक मामिला तथा कानून मन्त्री पूर्णा जोशी, सामाजिक विकासमन्त्री लालबहादुर खड्का, भौतिक पूर्वाधार विकास मन्त्री दीर्घ सोडारीलाई स्पष्टीकरण सोधेका छन् ।

यस्तै राज्यमन्त्रीमा नियुक्त चुनकुमारी चौधरी, अर्चना गहतराज र मना साउदलाई पनि २४ घण्टे स्पष्टीकरण सोधिएको छ । प्रदेश संसदीय दलको सचेतकमा शुक्रबार नियुक्त भएका दुर्गा कामीलाई पनि स्पष्टीकरण सोधिएको छ । यसअघि निर्वतमान तीन मन्त्रीलाई स्पष्टीकरण सोधिएको थियो ।

स्पष्टीकरणको चित्तबुझदो नआएको भन्दै उनीहरुलाई पार्टीले साधारण सदस्यसमेत नरहने गरी कारबाही गरेको एमाले प्रदेश कमिटी अध्यक्ष कर्ण बहादुर थापाले जानकारी गराएका थिए । उनीहरुलाई एमालेको स्थायी कमिटीको बैठकको निर्णयविरुद्ध प्रदेश सरकारमा मन्त्री भएको आरोप लग्दै आएको छ ।