काठमाडौँ । बजेट आउनुभन्दा केही दिन अघिदेखि हिजो आइतबार लगातार उकालो लागेको शेयर कारोबार मापक नेप्से आज ठूलो अंकले ओरालो लागेको छ ।

बजर परिसुचक ४५ दशमलब २५ अंकले घटेर २ हजार ७ सय ८२ दशमलब ६८ बिन्दुमा पुगेको छ । यो अघिल्लो दिनको तुलनामा १ दशमलब ६ प्रतिशतले कमी रहेको स्टक एक्सचेञ्जले जनाएको छ ।

सोमबार कारोबार भएका कम्पनी समुहका उपसुचकमध्ये मिच्युल फण्ड बाहेक अरु सबैले घाटा ब्यहोरेकाले बजार परिसुचकमा ओरालो लागेको हो ।

कूल २ सय १८ कम्पनीको १ लाख ४८ हजार ७ सय १५ कम्पनीका १३ अर्ब ९० करोड ९१ लाख १३ हजार २ सय ९१ रुपैयाँ बराबरका ३ करोड ८ लाख ८८ हजार ६ सय ९५ कित्ता शेयर किनबेच भएका छन् ।

नेपाल धितोपत्र बोर्डले जलविद्युत कम्पनीलाई हकप्रद सेयर जारी गर्न रोक लगाउने भएको छ । पछिल्लो समय घाटामा रहेका जलविद्युत आयोजनाहरुल पनि पैसा संकलन गर्ने नाममा हकप्रद जारी गर्ने लहर चलेसँगै बोर्डले त्यसलाई रोक लगाउन लागेको हो ।

सेयर बजारसम्बन्धी नियमन तथा अनुगमन गर्ने आधिकारिक निकाय धितोपत्र बोर्ड भएपनि बोर्डले सक्रिय रुपमा आफ्नो भुमिका निभाउन नसकिरहेको गुनासो बढिरहेको बेला बोर्डले पछिल्लो समय सक्रियता बढाएको हो ।

केही समयअघि बजारमा भइरहेको सेयर कर्नरिङ र सर्कुलर ट्रेडिङको अनुसन्धान अघि बढाएको बोर्डले जलविद्युत क्षेत्रमा भइरहेको विकृतिमा रोक लगाउन हकप्रद सेयर जारी गर्न रोक लगाउने भएको हो ।