काठमाडौं । काठमाडौंको नयाँबस्तीमा सिमेन्टको बोराभित्र भेटिएको शव विभत्स तरिकाले हत्यापछि फ्याँकिएको पाइएको छ । प्रहरीका अनुसार दुई साताअघि नै हत्या भएर शरीरका केही भाग मात्रै फ्याँकिएको पाइएको छ ।

मंगलबार बिहान दुबो टिप्न गएकी एक महिलाले बोरा देखेर शंका लागेपछि प्रहरीलाई खबर गरेका थिए । उक्त खबर पाउने बितिकै प्रहरीको टोली अनुसन्धानमा खटिएको छ ।
अनुसन्धानका लागि तालीम प्राप्त कुकुरको प्रयोग गरेको काठमाडौंका एसपी रमेश बस्नेतले बताए । सिमेन्टको बोरामा पोको बनाएर फालेको अवस्थामा शव फेला परेको खबर आएपछि महानगरीय प्रहरी वृत्त बौद्ध र महानगरीय प्रहरी परिसर काठमाडौंको टोली घटनास्थलमा पुगेको छ ।
शव पोस्टमार्टम र डीएनए प्रोफाइलका लागि त्रिवि शिक्षण अस्पताल पठाइएको प्रहरीले जनाएको छ ।