काठमाडौँ । उर्जा, जलस्रोत तथा सिंचाई मन्त्रालयले आज बिहान जारी गर्दै देशका विभिन्न नदी तथा तटीय क्षेत्रमा बसोबास गर्ने सर्वसाधारणलाई सर्तक हुन आग्रह गरेको छ । मन्त्रालयको बाढी पूर्वानुमान महाशाखाले कोशी नदीसहित यसका सहायक नदीहरू, पश्चिम राप्तीलगायतका नदीहरूको तटीय क्षेत्रमा बसोबास गर्ने सर्वसाधारणलाई सर्कत हुन आग्रह गरेको हो ।

यी नदीहरू तथा सहायक नदीमा बहाव बढ्दो क्रममा रहेको तर सबैमा बहाव सतर्कता तहभन्दा तल नै रहेको बाढी पूर्वानुमान महाशाखाले जनाएको छ ।

कोशी जलाधारका केही स–साना सहायक नदीमा क्षणिक मध्यम भारी वर्ष भई बहाव बढ्ने र केही स–साना नदीमा आकस्मिक बहाव भइ सतर्कता तह आसपास पुग्न सक्ने बताइएको छ ।

यस्तै, आज प्रदेश १ को इलाम झापा, मोरङ, सुनसरी, धनकुटा, उदयपुर, भोजपुर, ताप्लेजुङ, संखुवासभा र प्रदेश २ को सप्तरी, सिरहा, महोत्तरी, सर्लाहीमा जिल्लाका नदीहरूमा पानीको बहाव बढ्ने जनाएको छ ।

यस्तै, बागमती प्रदेशको दोलखा, रामेछाप, रसुवा, सिन्धुपाल्चोक, नुवाकोट, धादिङ, काठमाडौँ, चितवन, मकवानपुर, गण्डकी प्रदेशको गोरखा, मनाङ, लमजुङ, कास्की, पर्वत, बागलुङ, म्याग्दी, तनहुँ, स्याङ्जा, लुम्बिनी प्रदेशको पाल्पा, गुल्मी, प्यूठान, दाङ, बाँके, बर्दिया, रुकुमका जिल्लाहरूमा उच्च जोखिम रहेको छ ।

पूर्वानुमान महाशाखाले कर्णाली प्रदेशको सुर्खेत, सल्यान, दैलेख, जाजरकोट, कालिकोट, हुम्ला र सुदूरपश्चिम प्रदेशको कञ्चनपुर, कैलाली, डडेलधुरा, डोटी, अछाम, बाजुरा, बझाङ, दार्चुला र आसपास जिल्ला भइ बहने स–साना नदी जलाधारमा बहाव उल्लेख्य बढ्ने जनाएको छ ।