काठमाडौँ । सुनको मूल्य आज बुधबार प्रतितोला ३ सय रुपैयाँले सस्तो भएको छ । यस्तै, चाँदी प्रतितोला ५ रुपैयाँले सस्तो भएको छ ।

हिजो मंगलबार प्रतितोला ९१ हजार रुपैयाँमा कारोबार भएको सुन बुधबार ९० हजार ७ सय रुपैयाँमा किनबेच भइरहेको छ । यस्तै, चाँदी प्रतितोला एक हजार २९५ रुपैयाँमा कारोबार भएको छ । मंगलबार चाँदी एक हजार ३०० रुपैयाँमा किनबेच भएको सुनचाँदी व्यवसायी महासंघले जनाएको छ ।

यसैबीच सुनको आयात कोटा बढाउन व्यवसायीको आग्रह गरेका छन् । दैनिक कोटा ३० किलो पुर्याउनु पर्ने महासंघद्वारा जारी विज्ञप्तिमा उल्लेख छ । यसअघि सरकारले दैनिक २० किलो सुन आयात गर्ने गरी निर्णय गरेको छ । उक्त निर्णयमाथि व्यवसायीहरुले असन्तोष जाहेर गर्दै आएका छन् ।

पछिल्लो समय सुनचाँदी पसल खुले पनि बजारको मागअनुसार सुन नभएपछि यसको आयात कोटा बढाउन आग्रह गरेको हो । कोभिड–१९ को नियन्त्रणको क्रममा सरकारले गत वैशाख १६ गतेदेखि लक–डाउन निषेधाज्ञा जारी गरेको थियो ।

जसका कारण व्यापार, व्यवसायलगायतका क्षेत्रहरु बन्द भएकाले वाणिज्य बैंकहरुले बिक्री वितरण गर्ने सुनको आपूर्ति पनि बन्द भएको थियो ।