काठमाडौँ । नेकपा एमालेका वरिष्ठ नेता माधवकुमार नेपालले पार्टी अध्यक्ष तथा प्रधानमन्त्री केपी शर्मा ओलीले गल्ती स्वीकार गरेर आए उनलाई स्वागत गर्न सकिने बताएका छन् ।

आज संसद भवन नयाँ वानेश्वरमा सम्पादकहरूसँगको छलफलमा नेता नेपालले आफुहरु कुर्सीका लागि नभई देशको संविधान र संघीय लोकतान्त्रिक गणतन्त्र जोगाउन लागेको बताए । उनले अहिलेको बेलामा सवैको हातेमालो आवश्यक रहेको बताए । उनले देश जोगाउने जिम्मेवारी राजनीति दल र मिडियाकर्मीको भएको बताए ।

उनले भने, देश जोगाउने अभिभारा तपाइँहरुको हो, हाम्रो हो, हामी सवैको हो । देशमा गणतन्त्र आएको छ, संघीयता आएको छ । जनताको चेतना प्रखर भएको छ । सुशासनको प्रत्याभुति, संविधानको रक्षा र सहि काम गरेर जनताको जीवनलाई सम्मृद्ध बनाउनुपर्ने बेलामा संसदलाई विघटन गरेर चुनाव नै हुननसक्ने चुनावको घोषणा गर्नु ओलीको अहंकार मात्रै हो । यो कोर्स करेक्सन गरौ । त्रुटि कमजोरी हुन्छन् सुधार गर्न सकिन्छ ।’ उनले ओलीको अहंकारले संसद विघटन गरेपनि कोर्स करेक्सन गर्न सकिने बताए ।