काठमाडौँ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले प्रधानमन्त्री केपी ओलीभन्दा कांग्रेस वामपन्थी भएको बताएका छन् । सम्पादकहरुसंगको अन्तरक्रिया कार्यक्रमा प्रचण्डले ओलीले दक्षिणपन्थी शक्तिसंग मिलेर वामपन्थी सिध्याउन लागेको आरोप लगाएका छन् ।

उनले कांग्रेस संविधान र लोकतन्त्र बचाउन लागेको तर ओली संविधान र लोकतन्त्र सिध्याउन लागेका बताए । प्रचण्डले ओलीले आफूलाई फोन गरेर ‘तपाई वामपन्थीको सरकार ढालेर काँग्रेससँग मिलेर के गर्न लाग्नुभएको ?’ भनेर सोध्दा आफूले ‘काँग्रेस त तपाइँभन्दा धेरै वामपन्थी रहेको जवाफ दिएको बताए । अको प्रश्नमा प्रचण्डले गठबन्धन लामो समयसम्म रहिरहने बताए ।

राजनीतिक र सैद्धान्तिक धरातलमा उभिएको गठबन्धन भएको भन्दै उनले संविधान, लोकतन्त्र, राष्ट्रियता र जनताको पक्षमा उभिन गठबन्धनमा रहेका सबै दलबीच न्यूनतम सहमति भएको बताए ।

उनले भने, ‘सरकार बनाउन वा एउटा निर्वाचन जित्नका लागि मात्रै गठबन्धन गरिएको होइन । एउटा चुनाव जित्न वा ओली हटाउनका लागि मात्रै नभएर दीर्घकालीन रुपमा संविधान, लोकतन्त्र र राष्ट्रियता जोगाउन गठबन्धन निरन्तर रहने छ । गठबन्धनमा रहेका दलमध्ये नेपाली कांग्रेस, नेकपा माओवादी केन्द्र र राष्ट्रिय जनमोर्चामा आन्तरिक राजनीतिक समस्या छैन । विद्रोहको झण्डा बोक्ने एमालेका माधव नेपाल र जसपाका अध्यक्ष उपेन्द्र यादवका समस्या पनि गठबन्धनको साझा समस्या हुन् । ती समस्या सबै मिलेर समाधान गरिन्छ ।’

‘कांग्रेस, जनमोर्चा र हामीमा समस्या छैन । माधवजी र उपेन्द्रजीहरुलाई परेको अप्ठ्याराहरुमा हामी संगै छौं। त्यसलाई गठबन्धनले साझा रुपमा लिन्छ’, दाउनले भने । उनले नेपालको भूराजनीतिक जटिलताका कारण यसको आफ्नै समस्या भएपनि राष्ट्रको स्वतन्त्रता र सार्वभौमसत्ता रक्षा गठबन्धनको साझा एजेण्डा रहेको बताए । प्रचण्डले ओली यति धेरै गल्ती गर्दा पनि गल्ती स्वीकार गर्न तयार नभएको बताए ।