काठमाडौं । सरकारले फागुन सम्ममा कोरोना विरुद्धको ५ करोड २२ लाख डोज खोप ल्याउने प्रक्रियामा अघि सारेको जनाएको छ। स्वास्थ्य तथा जनसंख्या मन्त्रालयले हालसम्म नेपालमा अनुदान तथा खरिद गरेर १ करोड ८ लाख ६० हजार १७० डोज प्राप्त गरेको जनाएको छ ।

मन्त्रालयका प्रवक्ता डा. कृष्ण पौडेलले सरकार फागुन मसान्त सम्म ५ करोडभन्दा बढी खोप ल्याउने तयारीमा जुटेको जानकारी दिए ।

असोज मसान्तसम्म करिब एक तिहाई जनसंख्यालाई खोप दिइसक्ने मन्त्रालयले जनाएको छ। असोज मसान्तसम्म १ करोड २ लाख खोप ल्याउने तयारी भएको मन्त्रालयका प्रवक्ता डा. पौडेलले जानकारी दिए ।

मन्त्रालयको तथ्यांक अनुसार हालसम्म ४५ लाख ४१ हजार ६८२ पहिलो मात्रा खोप प्राप्त गरेका छन्। २७ लाख २१ हजार ७ ८२ पुर्ण खोप लगाइसकेका छन्।

हालसम्म कुल जनसंख्याको ९ दशमलब ५१ प्रतिशतले पूर्णखोप पाएको र १३ दशमलब २८ प्रतिशतले पहिलो मात्रा पाएको मन्त्रालयले जनाएको छ।

सरकारले कुल जनसंख्याको ७२ प्रतिशत अर्थात २ करोड १७ लाख ५६ हजार ७६३ लाई कोभिडविरुद्धको खोप लगाउने लक्ष्य लिएको छ। जसमध्ये हालसम्म २१ दशमलब १ प्रतिशतले पहिलो मात्रा र १३ दशमलब २८ प्रतिशतले दोस्रो मात्रा खोप पाएका समेत मन्त्रालयले जनाएको छ।