काठमाडौँ । अफगानिस्तानमा एकपछि अर्को सहरहरू कब्जा गरिरहेको तालिवान लडाकुको समूहले अफगानिस्तानको दोस्रो ठूलो सहर कान्दहार कब्जा गरेको छ । शुक्रबार बिहान उनीहरूले सो कुरा सार्वजनिक गरेका हुन् ।

आज उनीहरूले अफगानिस्तानको कान्दाहार र लस्कार गाह सहर आफूले नियन्त्रणमा लिएको दाबी गरेका हुन् । यस सहर नियन्त्रणमा लिएर आफूहरूले ठूलो सफलता हासिल गरेको उनीको दाबी छ ।

दक्षिण अफगानिस्तानका यी दुई सहर तालिवानका लागि निकै महत्वपूर्ण विजय भएको लडाकुले दाबी गरेका छन् । त्यस सहरलाई तालिवानको बलियो पकड भएको क्षेत्रका रुपमा लिइएको थियो । त्यसैले विगतमा यहाँ नेटो र अफगान सेनाको ठूलो सुरक्षा दिइएको थियो ।

कान्दाहार सहर अफगानिस्तानको प्रमुख व्यापारिक केन्द्र हो । त्यसैले उनीले यसलाई ठूलो उपलब्धि भनेका हुन् । अफगानिस्तानमा जारी संघर्षका बीचमा तालिवानले बिहीबार मुख्य सहर घाज्नी र हेरात आफ्नो नियन्त्रणमा लिइएको बताएको थियो ।

पछिल्ला दिनमा तालिवानले देशैभरि आफ्नो विस्तारलाई कायम राख्ने जनाएको छ । यसै क्रममा उसले विभिन्न सहरमा कब्जा जनाउँदै आएको हो । उनीहरुको कब्जा बढ्दै गएपछि पश्चिमा देशहरुले आफ्ना दूतावासका कर्मचारी र नागरिकहरूलाई सुरक्षित रूपमा स्वदेश फर्काउन थालेका छन् ।