काठमाडौं । मानव तस्करी गर्ने तीनजनालाई प्रहरीले काठमाडौंको कपनबाट पक्राउ गरेको छ ।

प्रहरीको केन्द्रीय अनुसन्धान ब्युरोले कपनस्थित राममन्दिर छेउ बस्ने नोरुल अमिनलाई सोमबार पक्राउ गरेको हो । ब्यूरोले कपनस्थित राममन्दिर छेउ बस्ने सकिफ आलम र डल्लु बस्ने अजमत उल्लाहलाई भने शनिबार नै पक्राउ गरेको थियो ।

बंगालादेशमा शरणार्थी जीवन बिताइरहेका म्यानमारका रोहिंग्या शरणार्थीहरुलाई अमेरिका लैजाने भन्दै नेपाल ल्याएर उनीहरुले मानव तस्करी गरेको प्रहरीले जनाएको छ ।

उनीहरुले दुई परिवारका १४ जना रोहिंग्या शरणार्थीलाई नेपाल भित्राइसकेको अनुसन्धानबाट खुलेको प्रहरीले जनाएको छ ।

उनीहरुले बंगालादेशको ढाकादेखि भारतको बाटो हुँदै नेपालसम्म मानव तस्करी गर्दा प्रतिव्यक्ती झण्डै साढे तीन लाख रुपैयाँ लिइरहेको पनि ब्यूरोले जनाएको छ ।

ब्यूरोकाअनुसार पक्राउ परेका तीनै जना काठमाडौंमा विभिन्न पेशाकर्मीको आवरणमा मानव तस्करी गर्दै आएका थिए ।