काठमाडौ‌ं । एएफसी महिला एसियन कप–२०२२ छनोट अन्तर्गतको दोस्रो खेलमा नेपालले मंगलबार हङकङको सामना गर्दैछ ।

उज्वेकिस्तानको तास्केन्तस्थित जेएआर मैदानमा समूह ‘एफ’को खेलमा नेपालले हङकङसँग प्रतिस्पर्धा गर्न लागेको हो ।

यसअघि समूह ‘एफ’ को पहिलो खेलमा फिलिपिन्ससँग पराजित भइसकेको नेपाल आगामी वर्ष भारतमा आयोजना हुने एएफसी महिला एसियन कपमा भाग लिन मंगलबारको खेल जित्नैपर्ने बाध्यता छ ।

फिफाको महिला वरीयतामा नेपाल १०१ र हङकङ ७६ स्थानमा छ ।

पहिलो खेलमा नेपाल अन्तिम समयमा फिलिपिन्सविरुद्ध २–१ गोल अन्तरले पराजित भएको थियो । खेलको सुरुवाती १० मिनेटमै विमला चौधरीको गोलमा अग्रता बनाएको नेपालले इन्ज्यूरी समयमा फिलिपिन्सले गरेको दुई गोलका कारण पराजित भएको थियो ।

मंगलबार हङकङविरुद्धको खेलमा नेपाल पराजित भएमा पुनः चौथो पटक नेपाल समूहचरणबाटै बाहिरिनेछ । हङकङलाई पराजित गरेमा भने नेपालको गणितीय सम्भावना कायमै रहने देखिएको छ ।

शनिबार समूह ‘एफ’ कै फिलिपिन्स र हङकङले प्रतिस्पर्धा गर्नेछन् । यदि यस खेलमा हङकङ विजयी भए समूह ‘एफ’ का तीनै टोलीको समान ३ अंक हुनेछ र समूहको शीर्षस्थान गोल अन्तरका आधारमा हुनेछ । जहाँबाट नेपालको छनोट सम्भावना रहेको छ ।

यदि हङकङविरुद्ध फिलिपिन्सले जित हासिल गरे स्वतः ६ अंकसहित फिलिपिन्स आगामी वर्ष भारतमा आयोजना हुने महिला एसियन कपमा समूह ‘एफ’ बाट छनोट हुनेछ ।