काठमाडौं । सत्तारुढ प्रमुख घटक नेपाली काँग्रेसका महामन्त्री डा. शशांक कोइरालाले सांसद पदमुक्त गराउने माग सभामुखले पूरा गर्न नसक्ने बताएका छन् ।

सभामुख अग्नीप्रसाद सापकोटाले माधव नेपालसहितका १४ जना सांसदहरुलाई पदमुक्त गराउने प्रमुख प्रतिपक्ष दल नेकपा एमालेको माग सम्बोधन गर्न नसक्ने उनले स्पष्ट गरे ।

अध्यादेशबाट दल विभाजन भइसकेको अवस्थामा सभामुख सापकोटाले माधव नेपालसहितका सांसदहरुलाई पदमुक्त गराउनुपर्ने नेकपा एमालेको माग पूरा गर्न नसक्ने प्रतिक्रिया दिए ।

सोमबार प्रतिनिधिसभा बैठकबाट बाहिरिने क्रममा सञ्चारकर्मीहरुसँग कुरा गर्दै कोइरालाले २० प्रतिशतले पार्टी विभाजन गर्न सक्ने गरी विधेयक आएर पार्टी टुक्रिसकेकाले एमालेको माग जायज नभएको बताए ।

कांग्रेस महामन्त्री कोइरालाले मुलुकमा राजनीतिक स्थिरता कायम गर्न राजनीतिक दल सम्बन्धि अध्यादेश प्रतिस्थापन गर्न सरकारले विधेयक ल्याउन लागेको पनि उल्लेख गरे ।