काठमाडौं । माधव नेपाल नेतृत्वको नेकपा (एकीकृत समाजवादी) पार्टीले देउवा सरकारमा सहभागी हुने मन्त्रीहरुको टुङ्गो लगाएको छ ।

नेता नेपालले आफ्नो पार्टीबाट मन्त्री बनाउन नेताहरुको सूची प्रधानमन्त्री शेरबहादुर देउवालाई बुझाएका छन् ।

सरकारले राजनीतिक दलसम्बन्धी अध्यादेश फिर्ता गर्न सहमत भएपछि नेकपा एसले सरकारमा पठाउने पाँच मन्त्रीको टुंगो लगाएको हो ।

एमाले सरकारमा मन्त्री भएका प्रेम आलेदेखि पार्टी विभाजनमा महत्वपूर्ण भूमिका खेलेकी रामकुमारी झाँक्री पनि सरकारमा जाने भएका छन् ।
सरकारमा पठाउन विरोध खतिवडा, मेटमणि चौधरी र जीवनराम श्रेष्ठको नाम पनि टुंगो लगाइएको स्रोतको दाबी छ । नेकपा एसलाई ६ मन्त्रालय दिने बताइए पनि एक जना मन्त्रीको टुंगो लागेको छैन ।

कांग्रेस सभापति शेरबहादुर देउवा प्रधानमन्त्री बनेको अढाई महिना भइसक्दा पनि मन्त्रिपरिषद्ले पूर्णता पाएको छैन ।

राजनीतिक दलसम्बन्धी अध्यादेश प्रतिस्थापन गरेर मन्त्रिपरिषद विस्तार गर्ने तयारी गरिएको छ । सोमवार नै राष्ट्रपतिले राजनीतिक दलसम्बन्धी अध्यादेश खारेज गरेकी छन् ।