काठमाडौँ । नेकपा माओवादी केन्द्रका अध्यक्ष पुष्पकमल दाहाल प्रचण्डले आफूसामु प्रतिगमनका विरुद्ध लड्ने कि आत्महत्या गर्ने भन्ने सोच आएको बताएका छन् । पार्टीको विद्यार्थी संगठन अनेरास्ववियु (क्रान्तिकाकारी)को २२ औँ राष्ट्रिय सम्मेलनलाई सम्बोधन गर्दै उनले यस्तो बताएका हुन् ।

गत पुस ५ गते संसद विघटन भएसँगै आफूसामु लड्ने कि आत्महत्या गर्ने भन्ने विकल्प देखिएको उनले स्मरण गरे । तर, आफूले सबै नेताहरूको साथ लिएर प्रतिगमनका विरुद्ध लड्ने निर्णय गरेको र त्यसमा सफल भएको बताएका थिए ।

उनले आफू झण्डैझण्डै आत्महत्या गर्नु पर्ने अवस्थामा पुगेको भन्दै भने ‘आत्मसमर्पण त गर्न सक्दिनँ, हजारौँ शहिद, घाइते अपांगको ऋण मेरो टाउकोमा छ, मैले या त सकिन, यत्ति नै रहेछ भने सुसाइड गर्नु पर्ने या त लड्नु पर्ने ठाउँमा पुगेको देखेँ ।’

उनले पार्टीका नेताको साथ पुनः लड्ने संकल्प गरेको बताए । उनले भने, ‘मारिनु पर्छ भने पनि तयार हुने संकल्प गरियो, त्यही संकल्पबाट सडक आन्दोलन सुरु भयो ।’

यस्तै, उनले २०५२ सालमा जनयुद्धको तयारी गर्दासमेत अहिलेको जस्तै अवस्था आएको बताए । तर, जनयुद्ध सुरु भएपछि हजारौँ योद्धाहरू आबद्ध भएको, अवसरवादी होला भनेका नेताहरु महान् भएको उनले स्मरण गरे । अन्तःमा उनले नेताहरू बिग्रिएको भन्दै कार्यकर्ताहरू सही भएको बताए ।