काठमाडौँ । नेकपा एमालेका नेता रामबहादुर थापा बादलले विधान महाधिवेशनलाई सरकारले जारी गरेको सूचनाले कुनै असर नपर्ने बताएका छन् । काठमाडौँ जिल्ला प्रशासनले बिहीबार कुनै पनि सभा सम्मेलन गर्न नहुने सूचना जारी गरेको सन्दर्भमा पत्रकारले सोधेको प्रश्नमा उनले यस्तो बताएका हुन् ।

चाड पर्व नजिकिँदै गर्दा काठमाडौँ जिल्ला प्रशासनले कोरोना भाइरस (कोभिड-१९) संक्रमण रोकथाम गर्ने उद्देश्यका साथ सभा सम्मेनल नगर्न तथा भिडभाड नगर्न भन्दै आदेश जारी गरेको छ । ‘सरकारले स्वास्थ्य मापदण्ड पूरा नगरी महाधिवेशन नगरोस् भन्ने मनसाय होला, हामीले स्वास्थ्य मापदण्ड पूरा गरेर सभा सम्मेलन गर्ने छौँ,’ नेता थापाले भने, ‘त्यस कारण सरकारले आज जुन सूचना निकालेको छ भनेपति त्यो कुनै स्वास्थ्यसँग सम्बन्धित नभएर अलिकति राजनीतिक प्रेरित भएको हुन सक्छ ।’

उनले सरकारलाई नेकपा एमालेको विधान महाधिवेशन हुने कुरा पहिले नै थाहा भएको बताउँदै आज निकालेको वक्तव्य केही राजनीतिक प्रेरित भएको बताए । उनले सरकारको सूचनलाई ध्यानमा राख्दै विधान महाधिवेशन सम्पन्न गर्ने बताएका थिए ।