काठमाडौँ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले मन्त्रिपरिषद् विस्तार सम्भवत आजै हुने बताएका छन् । उनले आजै मन्त्रिपरिषद् विस्तार भएर सपथसमेत हुने बताएका हुन् ।

प्रधानमन्त्री शेरबहादुर देउवाले नेपाली कांग्रेस, माओवादी, जनता समाजवादी पार्टी (जसपा) र नेकपा एकीकृत समाजवादीसहितको गठबन्धन सरकारको नेतृत्व असार २९ यता गरे पनि अहिलेसम्म मन्त्रिपरिषद्लाई विस्तार गर्न सकिरहेका छैनन् ।

मन्त्रिपरिषद विस्तार हुन नसकेको भन्दै देउवाको यसमा चर्को आलोचना हुँदै आइरहेको छ । सत्ता गठबन्धन दलका बीचमा मन्त्रालय भागबण्डाका कार्यदल तहमा आइतबार दिनभर छलफल भएको थियो । गठबन्धन दलभित्रका नेकपा एकीकृत समाजवादीका अध्यक्ष माधव नेपाल आजै ५ दिनको अस्पताल बसाईपछि घर फर्केकै दिन माओवादी अध्यक्ष प्रचण्डले मनित्रपरिषद् विस्तार सम्भवत हुने बताएका हुन् ।

पार्टी केन्द्रीय कार्यालय पेरिसडाँडामा पार्टीनिकट नेपाल बुद्धिजीवी संगठनको राष्ट्रिय भेलालाई सम्बोधन गर्दै प्रचण्डले त्यस्तो बताएका हुन् । ‘क्याबिनेट विस्तार गरेर आज सपथ ग्रहण गर्ने नभए टुंग्याउने काम भने हुन्छ,’ उनले भने ।

आफूले पार्टीभित्रको पुर्नगनठको कुरा गर्दा मान्छेहरूले अनेक कुरा गरेको भन्दै त्यसमा भ्रममा नपर्न बताए । पार्टीमा गुट भत्काउन खोजेको पनि प्रचण्डले बताए । पार्टीमा सबैको गुट हुने भए अध्यक्ष एक्लै हुन्छ नि भन्दै उनले त्यस्तो गुट पार्टीमा रहेछ भने भत्काउने बताए ।

उनले छिट्टै माओवादीमा ठूला ठूला नेता आउने दाबीसमेत गरे । ‘नाम नभनौं केही ठूलै नेताहरु पार्टीमा आउने गरी छलफल चलिरहेको छ,’ प्रचण्डले भने ।

उनले आजै एउटा पार्टीसँग एकताका लागि छलफल गर्न जान लागेको बताएका थिए । यद्यपि, उनले पार्टी र व्यक्तिका बारेमा भने केही उल्लेख गरेनन् ।