काठमाडौं । काठमाडौँ उपत्यकामा चल्ने सार्वजनिक यातायात सेवा बन्द गरेर सोमबार विरोध प्रदर्शन भयो ।

सार्वजनिक यातायात केन्द्रीय महासंघको आह्वानमा भाडा समायोजनको एक सूत्रीय माग राखेर उनीले सडकमै गाडी तेर्साएर बाटो अवरोध गरे ।

उनीहरूले सरकार, म मरूँ कि बाचौँ ? जस्ता प्लेकार्डहरु गाडीमा झुण्डिएका थिए ।

यातायात ब्यवसायीहरुको आन्दोलन चलिरहँदा काठमाडौंबाट देशैभरका लागि यात्रुवाहक गाडी छुट्ने ठाउँ नयाँ बसपार्कको दृष्य भने फरक थियो ।

टिकट काउन्टर अगाडि मध्यम तथा लामो दूरीको सार्वजनिक सवारीको पछिल्लो पटक लागू गरिएको भाडा दर तोकिएको बोर्डहरु राखिएका छन् । असार २९ गतेदेखि लागू हुने गरी तोकिएको भाडा दर उल्लेखित बोर्डले यात्रुलाई गिज्याइरहेको थियो ।

दशैंका लागि असोज ११ गतेदेखि अग्रिम बुकिङ खुला गरिएको छ । दशैंका लागि भन्दै खुला गरिएको अग्रिम टिकट बुकिङ काउन्टरमा पुगेका यात्रुले खोजेको ठाउँको टिकट भने पाउँदैनन् ।

यात्रुलाई डिलक्स, एसी बसका लागि भन्दै हातले लेखिएको दररेट बस काउन्टरको भित्तामा टाँसिएका छन् ।

त्यहि भित्ता टाँसिएको भाडादरमा पनि खोजेको ठाउँको टिकट पाइँदैन । सोमबार बुटवल जाने टिकट मागेका यात्रु सुशील शर्माले बुटवलको टिकट पाएनन् । उनलाई काठमाडौंदेखि चाकलचौकीसम्मको टिकट काटियो ।

सुशील मात्र होइन, अधिकांश यात्रुले जुन ठाउँ जाने हो, त्यो भन्दा टाढाको टिकट काट्नुपर्छ । टिकट सकिएको भन्दै नजिकका यात्रुलाई पनि टाढाको टिकट काट्न बाध्य पारिएको छ ।

दशैंको बेलामा यात्रुहरुलाई सहज होस् भनेर हरेक वर्ष अग्रिम टिकट बुकिङ गर्ने गरिएको छ । तर हरेक वर्ष यात्रुहरु ठगिने गरेका छन् ।