काठमाडौँ । दार्चुलाको महाकाली नदिमा भारतीय सीमा सुरक्षा बल (एसएसबी)ले तुइन काटेपछि दार्चुलामा हेलिकप्टरबाट खाद्यान्न ढुवानी गरिँदैछ । दार्चुलाको व्याँस गाउँपालिकाबाट सदरमुकाम खलगां आउने तुइन एसएसबीले काटेपछि खाद्य संस्थानले दसैँ तिहारकालागि हेलिकप्टरबाट खाद्यान्न ढुवानी गरिरहेको हो ।

१५ साउनमा एसएसबीले नदी पार नहुँदै तुइनको फलामे डोरी निकालिदिंदा ब्यास गाउँपालिका–२ मालघाटका ३० वर्षीय जयसिंह धामी महाकाली नदीमा खसेर बेपत्ता भएका थिए । तुइन काटेपछि सदुरमुकाम खलंगा जाने बाटो नहुँदा व्याँस गाउँपालिकामा खाद्यान्नको अभाव भएको थियो ।

खाद्य संस्थानले दसैँ तिहारकालागि हेलिकप्टरबाट व्याँस गाउँपालिकाका छांगरु, तिंकर, दुम्लीङ, राप्ला, माल, सीना, सुनसेरा लगायतका स्थानमा ६ सय क्वीन्टल खाद्यान्न गर्दैछ । हेलिकप्टरबाट खाद्यान्न झारिएको ठाउँबाट स्थानिय महिलाहरु बाकेर लैजाँदै छन् । व्याँस गाउँपालिकामा यातायातको सुविधा छैन । दार्चुलाका दुर्गम गाउँमा प्रत्येक वर्ष दसैँ तिहारमा खाद्यको अभाव हुँदै आएको छ ।