काठमाडौं । सरकारले धितोपत्र बोर्डका अध्यक्ष भीष्मराज ढुंगानालाई बर्खास्त गरेको छ ।

मंगलबार बसेको मन्त्रिपरिषद् बैठकले धितोपत्र बोर्डका अध्यक्ष भीष्मराज ढुंगानालाई बर्खास्त गर्ने निर्णय गरेको हो ।

ढुंगाना सर्वोत्तम सिमेन्टको शेयर कारोबार प्रकरणमा मुछिएका थिए । उनलाई यसअघि असोज ११ गते बसेको मन्त्रिपरिषद् बैठकमा स्पष्टीकरण सोध्ने निर्णय भएको थियो । तर उनको स्पष्टीकरण चित्तबुझ्दो नआएको भन्दै बर्खास्त गर्ने निर्णय गरेको बताइएको छ ।

यसअघि नै अर्थमन्त्रालयको निलम्बनमा परेका उनलाई असोज ११ गतेको मन्त्रिपरिषद् बैठकले स्पष्टीकरण सोधेको थियो । सर्वोत्तम सिमेन्टको शेयर कारोबार प्रकरणकै कारण अर्थमन्त्रालयले ढुंगानालाई निलम्बन गरेको थियो ।

बोर्डको अध्यक्षमा रहँदा ढुंगानाले छोरी रेबिका ढुंगानाको नाममा सिमेन्ट कम्पनीको सेयर खरिद गरेको तथ्य बाहिरिएको थियो ।