काठमाडौँ । सरकारले बालबालिकालाई दिँदै आएको भिटामिन ‘ए’ र जुकाको औषधि खुवाउने मिति परिवर्तन गरेको छ । हरेक वर्ष कार्तिक ३ र ४ गते खुवाउँदै आएको भिटामित ए र जुकाको औषधि यस वर्ष ७ र ८ गते खुवाउने भएको छ ।

स्वास्थ्य तथा जनसंख्या मन्त्रालयले एक सूचना जारी गर्दै मिति परिवर्तन भएको जनाकारी दिएको हो । यस वर्ष नियमित समयमा दशैँ परेकाले मिति सार्नु परेको मन्त्रालयले जनाएको छ ।

यस्तै, भिटामिन ए र जुकाको औषधि खुवाउन जाँदा सही तरिकाले मास्क प्रयोग गरी भौतिक दूरी कायम गर्नसमेत आग्रह गरेको छ । मन्त्रालयले कोरोना भाइरस रोकथामका मापदण्ड पालना गरी कार्यक्रममा सहभागी हुन आग्रह गरेको छ ।