काठमाडौं । तेइस वर्षमुनीको नेपाली राष्ट्रिय फुटबल टोली इन्डोनेसियाको यु–२३ टोलीसँग पराजित भएको छ ।

एएफसी यु–२३ एसियन कप छनोटको तयारी स्वरुप ताजिकिस्तानमा शुक्रबार साँझ भएको खेलमा नेपाल २–० ले पराजित भएको हो ।

पहिलो हाफमा गोलरहित बराबरी खेलेको नेपालले दोस्रो हाफको ५० मिनेटमा र इन्ज्यूरी समयमा गरी दुई गोल खाएको थियो ।

एसियन कप छनोटमा नेपाल समूह ‘बी’ मा रहेको छ । नेपालको समूहमा ताजिकिस्तान, लेबनान र इरान रहेका छन् ।

नेपालले समूह चरणको पहिलो खेलमा इरानसँग अक्टोबर २५ मा तथा दोस्रो खेलमा ताजिकिस्तानसँग अक्टोबर २८ मा खेल्दैछ ।
समूहको अन्तिम खेल भने नेपालले लेबनानसँग अक्टोबर ३१ मा खेल्ने छ ।

उत्कृष्ट चार टोलीले एएफसी यु–२३ एसियन कप खेल्ने मौका पाउनेछन् ।