काठमाडौँ । नेपालमा इन्टरनेट बैंकिङमार्फत् भएको कारोबार संख्या र रकम पछिल्लो एक महिनामा निकै घटेको देखिएको छ ।

नेपाल राष्ट्र बैंकले प्रकाशित गरेको आर्थिक प्रतिवेदनमा भाद्र मसन्तसम्म इन्टरनेट बैंकिङमार्फत् भएको कारोबार संख्या ३ लाख १ हजार १२ रहेको पाइएको छ ।

यो गत श्रावण मसान्तसम्ममा ३ लाख ४० हजार ५२५ रहेको थियो । १ महिनाको अवधिमा नेपालमा इन्टरनेट बैंकिङ मार्फत् भएको कारोबार संख्या ३९ हजार ५१३ ले घटेको केन्द्रीय बैंकले जनाएको छ ।

गत आर्थिक वर्ष २०७७÷७८को असारदेखि चालु आर्थिक वर्ष २०७८÷७९श्रावण मसान्तसम्मको १ महिनामा इन्टरनेट बैंकिङ मार्फतको कारोबार ११ हजारले बढेको थियो । नेपाल राष्ट्र बैंकको प्रतिवेदन अनुसार भदौ मसान्तसम्म कारोबार रकम पनि १ अर्ब ६६ करोड ७० लाख रुपैयाँले घटेको छ ।

कारोबार संख्यामा ह्रास आएसँगै कारोबार रकममा पनि असर पर्ने प्रतिवेदनमा उल्लेख छ । अघिल्लो महिना अर्थात् श्रावण मसान्तसम्म इन्टरनेट बैंकिङमार्फत् १५ अर्ब १७ करोड १० लाख रुपैयाँको कारोबार भएकामा भाद्र मसान्तसम्म आइपुग्दा कारोबार रकम १३ अर्ब ५० करोड ४० लाख रुपैयाँमा पुगेको केन्द्रीय बैंकले जनाएको छ ।