काठमाडौँ । आईसीसी टी–२० विश्वकप क्रिकेटमा भारतले पहिलो जित निकालेको छ । आबुधाबीमा गएराति भएको खेलमा भारतले अफगानिस्तानलाई ६६ रनले हराएको हो ।

टस हारेर पहिला ब्याटिङ गरेको भारतले निर्धारित ओभरमा २ विकेट गुमाएर दुई सय १० रन बनाएको थियो । भारतले दिएको दुई सय ११ रनको लक्ष्य पछ्याएको अफगानिस्तानले निर्धारित ओभरमा ७ विकेट गुमाएर १ सय ४४ रन बनायो । जितसँगै सेमिफाइनलमा भारतले झिनो सम्भावना कायम राखेको छ ।

यसअघि भारत पाकिस्तान र न्युजिल्यान्डसँग पराजित भएको थियो । भारतले शुक्रवार स्कटल्यान्डसँग र सोमवार नामिबियासँग खेल्ने खेलमा फराकिलो जित र न्युजिल्यान्ड बाँकी दुई खेलमा एकमा पराजित भए नेट रनरेटको आधारमा भारत सेमिफाइनल पुग्ने झिनो आशा कामम छ । सुपर १२ को समूह दुईमा पाकिस्तान शीर्ष स्थानमा छ । अफगानिस्तान दोस्रो र न्युजिल्यान्ड तेस्रो स्थानमा छ । भारत चौथो र नामिबिया पाँचौँ स्थानमा छ । छैटौँ स्थानमा रहेको स्कटल्यान्ड बाहिरिएको छ ।