काठमाडौं । नेपाली कांग्रेसको १४ औं महाधिवेशनको निर्वाचन कार्यक्रम सार्वजनिक गरिएको छ । कांग्रेस केन्द्रीय निर्वाचन समितिले निर्वाचन कार्यक्रम जारी गरेको हो ।

महाधिवेशनको उदघाटन मंसिर २४ गते शुक्रबार गरिँदैछ । सोही दिन नै बिहान १० बजे महाधिवेशन प्रतिनिधिहरूको नाम प्रकाशन गरिने निर्वाचन समितिले जनाएको छ ।

यस्तै, मंसिर २५ गते बिहान १० बजेदेखि साँझ ५ बजेसम्म उम्मेदवारको मनोनयन दर्ता गरिनेछ भने सोही दिन बेलुका ५ बजेदेखि बेलुका ७ बजेसम्म उम्मेदवारी मनोनयन दर्ता उपर दाबी बिरोध र जाँचबुझको समय तोकिएको छ ।

दाबी विरोध उपर निर्णय २५ गते साँझ ७ बजेपछि ९ बजेसम्म हुनेछ ।

यसैगरी, उम्मेदवारको पहिलो नामावली प्रकाशन २५ गते बेलुका ९ बजेदेखि १२ बजेसम्म तोकिएको छ । उम्मेदवारको नामावली देवनागरि वर्णानुक्रमअनुसार हुने निर्वाचन समितिले जनाएको छ ।

यसैगरी, मनोनयन पत्र फिर्ता लिइसक्नुपर्ने समय मंसिरि २६ गते बिहान ११ बजेसम्म राखिएको छ ।

उम्मेदवारको अन्तिम नामावली प्रकाशन भने २६ गते दिउँसो १२ः१५ हुनेछ ।

मतदान २७ गते बिहान ८ बजेदेखि राष्ट्रिय सभागृह भृकुटीमण्डपमा सुरू हुनेछ।