काठमाडौँ । कैलालीमा हत्या आरोपमा नौ जनालाई पुर्पक्षका लागि जेल चलान गरिएको छ । घटनामा संलग्न तीन जनालाई धरौटीमा रिहा भएका छन् ।

जिल्लाको लम्कीचुहा नगरपालिका ३ का भूपेन्द्र बडुवालका हत्या प्रकरणमा संलग्न १२ जनामध्ये ३ जना धरौटीमा रिहा भएका हुन् । गत कात्तिक २७ गते टीकापुरमा हत्या गरेको आरोपमा पक्राउ परेकामध्ये लम्की चुहा नगरपालिका ५ का विकास खड्का, बर्दगोरिया गाउँपालिका २ बस्ने लोकेन्द्र कुँवर र बर्दियाको ठाकुरबाबा नगपालिका ३ बस्ने सविनजंग शाही धरौटी बुझाएर रिहा भएका हुन् ।

यस्तै, लम्की चुहा नगरपालिका ३ का महेश रावल, दीपेन्द्र शाही, आर्यन देवकोटा, मदन शाही, लम्की चुहा १ का कपिल श्रेष्ठ, निशान्त मल्ल, टीकापुर नगरपालिका १ का प्रवीण रिमाल, बर्दियाको राजापुर नगरपालिका ७ घर भएर टीकापुर नगरपालिका १ बस्ने रोहित आले र टीकपुरकै सोहन शाहलाई कारागार पठाइएको जिल्ला प्रहरी कार्यालय कैलालीले जनाएको छ ।

घटनामा संलग्न भएका ९ जना फरार रहेका छन् । उनीहरूको खोजी भइरहेको प्रहरीले जनाएको छ ।