सोलुखुम्बु । जिल्लाको मैदेल सेरोफेरो गुरुङ समाज लाउरे टोल काठमाडौँले दूधकोशी सामुदायिक अस्पतालको भवन बनाउन करिब ६० लाख रुपैयाँ सहयोग गरेको छ । सोलुको थुलुङ दूधकोशी गाउँपालिका ६ मैदेल स्थायी ठेगाना भई लाउरे टोल निवासी गणेशबहादुर गुरुङ र गोविन्द गुरुङले उक्त रकम संकलन गरेका हुन् ।

अस्पताल सञ्चालक समितिका कोषाध्यक्ष बलराम गुरुङले अनुसार समाजले समितिलाई आइतबार मात्र १४ लाख ८३ हजार रुपैयाँ हस्तान्तरण गरेको थियो । सो अवसरमा समाजका १०३ जनालाई खादासहित सम्मान पत्र प्रदान गरिएको थियो ।

थुलुङ दूधकोशी गाउँपालिका अध्यक्षसमेत रहेका अस्पताल सञ्चालन समितिका अध्यक्ष असिम राईले सबैको सहयोगबाट अस्पताल भवन निर्माण ९५ प्रतिशत पूरा भएको जानकारी दिए । आगामी फागुनको पहिलो हप्ताभित्र सञ्चालन गर्ने तयारी भएको उनले बताए ।

स्थानीयवासीलाई सामान्य उपचारका लागि समेत जिल्ला बाहिर जानु पर्ने बाध्यता रहेको छ । अस्पताल निर्माण सम्पन्न गर्न करिब ३० करोड खर्च हुने अनुमान गरिएको छ । गाउँपालिका केन्द्र मुक्लीमा रहेको सो अस्पताल निर्माणार्थ महायज्ञ समेत लगाइएको थियो ।