काठमाडौँ । बेलायतमा ठूलो संख्यामा कोरोना भाइरस (कोभिड–१९) संक्रमित थपिएका छन् । पछिल्लो तथ्यांकमा एकै दिन एक लाख २२ हजारभन्दा बढीमा कोरोना पुष्टि भएको छ । यो संख्या बेलायतमा कोभिड देखिएपछि अहिलेसम्मकै उच्च हो ।

कोभिडको नयाँ भेरियन्ट ओमिक्रोनका कारण बेलायतमा संक्रमितको संख्या दिनहुँ बढिरहेका छन् । बेलायतमा अहिलेसम्म कोभिडबाट एक लाख ४८ हजारको मृत्यु भइसकेको छ ।

बेलायतमा कोभिडको नयाँ भेरियन्ट ओमिक्रोनबाट अहिलेसम्म १२ जनाको मृत्यु भएको छ । विज्ञहरुले दैनिक संक्रमितको संख्या अझै बढ्ने चेतावनी दिएका छन् ।

नोभेम्बरको अन्तिममा दक्षिण अफ्रिकामा देखिएको ओमिक्रोन अहिले विश्वका ९० भन्दाबढी देशहरुमा फैलिएको छ ।