काठमाडौं । नेपाल प्रहरीको केन्द्रीय अनुसन्धान ब्यूरो(सिआइबी)ले न्यायाधीश विनोद गौतमलाई पक्राउ पूर्जी जारी गरेको छ । बालुवाटारस्थित सरकारी निवासको जग्गा हिनामिनासम्बन्धि मुद्दाको अनुसन्धानको क्रममा गौतमलाई पक्राउ पूर्जी जारी गरेको स्रोतले जनाएको हाे ।

अख्तियार दुरुपयोग अनुसन्धान आयोगले भन्दा बढी करिब तीन सय जनाविरुद्ध आरोप पत्र बनाइरहेको सिआइबीले केही व्यक्तिहरुलाई पक्राउ पूर्जी जारी गर्ने क्रममा न्यायाधीश गौतमलाई पक्राउ पूर्जी जारी गरेको हो । उनी यसअघि नै निलम्बनमा परिसकेका छन् ।

बालुवाटारस्थित ललिता निवास जग्गा प्रकरणमा हालसम्म २ सय १० जना विरुद्ध पक्राउ पूर्जी जारी गरेकोमा गौतमलाई केही दिन अघि मात्रै पक्राउ पूर्जी जारी गरेको सिआइबी स्रोतले जनाएको छ । उनी भौतिक योजना मन्त्रालयमा कानुन सचिव हुँदा वालुवाटार जग्गा काण्डमा मुछिएका थिए ।