काठमाडौँ । बाल विवाह न्यूनीकरण र लागु औषध दुव्र्यसन रोकथामका लागि प्रमुख जिल्ला अधिकारी (सिडिओ) र प्रहरी उपरीक्षक विद्यालय पुग्न थालेका छन् । राजबिराज नगरपालिका १६ बोरीयास्थित नरेन्द्र मेमोरियल जनता माध्यमिक विद्यालय पुगेका हुन् ।

सिडिओ जनार्दन गौतमले बाल विवाह न्यूनीकरणमा विद्यार्थीहरुको सक्रिय भूमिका रहने बताए । बालविवाहले निम्त्याउने असर र यसको न्यूनीकरणका लागि विद्यार्थीले निर्वाह गर्न सक्ने भूमिकाबारे उनले जानकारी गराएका थिए ।

जिल्ला प्रहरी कार्यालयका प्रहरी उपरीक्षक अविनारायण काफ्लेले समाजमा विद्यमान बाल विवाह र लागु औषध दुव्र्यसनको अवस्था र कानूनी प्रावधानबारे जानकारी गराउना यस विषयमा प्रहरीको आगामी योजनाबारे चर्चा गरे ।

समुदाय–प्रहरी साझेदारी अवधारणा अनुरुप सामुदायिक सेवा केन्द्र र जिल्ला प्रहरी कार्यालयको संयुक्त आयोजनामा भएको कार्यक्रममा राजविराज १६ का वडाध्यक्ष बुचाई दास, विद्यालयका शिक्षक र विद्यार्थीहरूले सचेतनामूलक कार्यक्रम निरन्तर गरिनु पर्नेमा जोड दिए ।

केन्द्रका अध्यक्ष हितनारायण लाल दासको अध्यक्षतामा भएको कार्यक्रममा कक्षा ९ र १० का विद्यार्थी, स्थानीय गाउँका बुद्धिजिवी, नागरिक समाजका अगुवाको सहभागिता थियो ।