काठमाडौं । कोरोना संक्रमण ह्वात्तै बढेपछि ललितपुर जिल्लमा सार्वजनिक सवारीमा कडाई गरिने भएको छ ।

ललितपुरमा सार्वजनिक सवारी साधनले स्वीकृत सिट क्षमताभन्दा बढी यात्रु राख्न नपाउने जिल्ला प्रशासन कार्यालयले निर्णय गरेसँगै प्रहरीले कडाई गर्ने भएको हो ।

जिल्ला प्रशासन कार्यालयले कोरोना संक्रमणको जोखिम बढ्दै गएको भन्दै मंगलबार राति १२ बजेदेखि सिट क्षमताभन्दा बढी यात्रु बोक्न नपाउने निर्णय गरेको छ ।

प्रशासनले सार्वजनिक सवारीमा यात्रा गर्ने सबै यात्रुले अनिवार्य रुपमा मास्क लगाउनुपर्ने, सवारी साधनको ढोकामा सेनिटाइजरको व्यवस्था गर्नुपर्ने, मास्क नलगाउने यात्रुलाई सवारी साधनमा प्रवेश गर्न नदिने लगायतको मापदण्ड बनाएको छ ।

यस्तै, चालक र सहचालकले अनिवार्य मास्क, भाइजर र पञ्जा लगाउनुपर्ने तथा दैनिक रुपमा सवारी साधनलाई सेनिटाइजर गर्नुपर्ने जस्ता मापदण्ड तोकिएको छ ।