काठमाडौं । केही दिनयता तीब्र रुपमा फैलिएको कोरोना भाइरस (कोभिड १९) संक्रमण खेलाडीहरुमा पनि भेटिएपछि जारी सहिद स्मारक ‘ए’ डिभिजन लिग प्रतियोगिता प्रभावित भएको छ ।

नेपाल पुलिस क्लबविरुद्ध आइतबार खेल्न तयार भएको च्यासल युथ क्लवका १९ जना खेलाडीमा कोरोना देखिएको छ ।

च्यासलका १९ खेलाडीमा कोरोना देखिएपछि आइतबार अपरान्ह पौने ५ बजे तय खेल स्थगित भएको छ ।

यसअघि प्रि–म्याचमा च्यासलका सहायक प्रशिक्षक आशीष राना मगरले डिफेन्डर कमल श्रेष्ठ र गोलकिपर प्रदीप भण्डारीलाई कोरोना देखिएको बताएका थिए । त्यसपछि गरिएको अन्य खेलाडीको रिपोर्टसमेत पोजिटिभ आएपछि खेल स्थगित गरिएको हो ।

पुलिस आठ खेलमा सात अंक जोडेर ११औं र च्यासल आठ खेलमा पाँच अंक जोडेर १३औं स्थानमा छ । ‘ए डिभिजन लिग कोरोनाको कारण स्थगित भएको पहिलोपटक हो । स्थगित खेल कहिले हुने त्यो भने बताइएको छैन ।