काठमाडौं । दार्चुला जिल्लाको सदरमुकाम खलङ्गापारी महाकाली नदीको प्राकृतिक बहाव रोक्ने उद्देश्यले भारतीय पक्षले तटबन्ध निर्माण कार्य अगाडि बढाइरहेको भन्दै राष्ट्रिय जनमोर्चाले आपत्ति जनाएको छ ।

राष्ट्रिय जनमोर्चाका अध्यक्ष चित्रबहादुर केसीले मंगलबार विज्ञप्ति जारी गर्दै नेपालसँग सहमति नलिई भारतले एकलौटी ढंगबाट जारी राखेको तटबन्ध निर्माण कार्यको भत्र्सना गरेका छन् ।

भारतले अन्तर्राष्ट्रिय सीमावर्ती क्षेत्रमा नेपालको सहमति नलिइ एकलौटी ढंगबाट संरचना निर्माण कार्य अगाडि बढाएर अन्तर्राष्ट्रिय नियम, कानून तथा प्रचलनको अतिक्रमण गरेको जनमोर्चाको ठहर छ ।
भारतले सुरु गरेको तटबन्ध निर्माण कार्यलाई तत्काल रोक्न पनि जनमोर्चाले नेपाल सरकारसँग माग गरेको छ ।

भारतले निरन्तर नेपालमाथि हेपाहा प्रवृत्ति देखाएको भन्दै मोर्चाले आपत्ति जनाएको छ ।
भारतले दशकौँदेखि दार्चुलाको कालापानीमा भारतीय सेना तैनाथ गर्नुका साथै भारतबाट तिब्बतको मानसरोवर जाने सडक निर्माण गर्ने क्रममा लिपुलेकस्थित नेपाली भूमि अतिक्रमण गरेर सडक निर्माण र विस्तार गरिरहेको पनि मोर्चाले जनाएको छ ।
दार्चुलाको मालघाट पारी तुइन तरिरहेका बेला भारतीय पक्षबाट नेपाली युवा जयसिंह धामीको हत्या गरिएको प्रशंग पनि जनमार्चाले स्मरण गराएको छ ।

‘सिलसिलेवार रुपमा भारतले नेपालको सार्वभौमसत्ता तथा अखण्डतामाथि ठाडो हस्तक्षेप गर्दै आएको छ । तर नेपाल सरकारले यी बिषयहरुमा दृढतापूर्वक भारतसँग कुराकानी राख्न नसकेकोप्रति पनि हाम्रो दलले सरकारको आत्मसमर्पणवादी नीतिको कडा विरोध गर्दछ ।’– केसीद्वारा जारी विज्ञप्तिमा भनिएको छ ।