काठमाडौँ । दक्षिण कोरियामा कोरोना भाइरसबाट एकै दिनमा अहिलेसम्मकै सबैभन्दा धेरै संक्रमित भएका छन् । कोरोनाको नयाँ भेरियन्टका रुपमा देखिएको ओमिक्रोनको संक्रमण फैलिन थालेकाले संक्रमितको संख्या भएको अधिकारीहरूले जनाएका छन् ।

स्वास्थ्य अधिकारीले दिएको जानकारी अनुसार पछिल्लो २४ घण्टामा दक्षिण कोरियामा ३६ हजार ३६२ जना नयाँ संक्रमित भएका छन् । अघिल्लो दिन २७ हजार ४४३ जना नयाँ संक्रमित थपिएका थिए ।

एकै दिनमा ३६ हजारभन्दा बढी संक्रमित भएको शनिबार पहिलोपटक हो । शनिबारको विवरणसँगै दक्षिण कोरियामा कोरोना भाइरसबाट अहिलेसम्म संक्रमितको कूल संख्या नौ लाख ७१ हजार १८ पुगेको छ ।

नयाँ संक्रमितमध्ये आठ हजार ५६४ जना राजधानी सोलका मात्रै रहेका छन् । सोही अवधिमा २२ जनाको मृत्यु भएको छ । यससँगै दक्षिण कोरियामा कोरोनाका कारण मृत्यु हुनेको संख्या ६ हजार ८५८ पुगेको छ ।