काठमाडौं । तीन अर्ब सम्मको ठेक्का अब नेपाली ठेकेदार कम्पनीले नै पाउने भएको छ ।

मन्त्रिपरिषदको सोमवार बसेको बैठकले तीन अर्बसम्मका ठेक्का नेपाली निर्माण व्यवसायीले नै लिन पाउने निर्णय गरेको हो । यसअघि नेपाली ठेकेदारले एक अर्बसम्मको मात्रै ठेक्का पाउने ब्यवस्था थियो । एक अर्बभन्दा बढीको ठेक्का विदेशी कम्पनीसँग मिलेर गर्नुपर्ने बाध्यता थियो ।

अब एक निर्माण व्यवसायीले ३ अर्ब बराबरका ५ वटा सम्म ठेक्का लिन पाउने श्रम,रोजगार तथा समाजिक सुरक्षामन्त्री कृष्णकुमार श्रेष्ठले बताए ।

सरकारको यो निर्णयसँगै अब सार्वजनिक खरिद नियमावली संशोधन हुनेछ ।

तीन अर्बसम्म नेपाली ठेकेदारले पाउने ब्यवस्था गरेको सरकारले ठेक्काको पेश्की रकम भने घटाएको छ । ठेकेदार कम्पनीले २० प्रतिशत पेश्की रकम पाउँदै आएकोमा त्यसलाई घटाएर १० प्रतिशतमा झारिएको छ ।