जनकपुर । प्रमुख प्रतिपक्षी दल नेकपा एमालेको स्थानिय तहका पार्टी कमिटि निर्माणमा केन्द्रीय नेताहरुकै स्वार्थ बाझिन थालेपछि समानान्तर कमिटीहरु निर्माण हुन थालेका छन् । एमाले सचिव रघुविर महासेठ र केन्द्रीय सदस्य यदुवंश झा वीच मधेसका पार्टी कमिटिमा आफनो समुहका नेतालाई जिम्मेवारी दिने स्वार्थ वाझिदा विवाद वढेको छ । विवाद वढदै जाँदा समानान्तर कमिटिी निर्माण हुन थालेको छ ।

एमाले सचिव समेत रहेका महासेठले ब्यवसायीलाई र झाले घुसकान्डमा परेर निलम्बनमा परेका वडा अध्यक्षलाई जनकपुरधाम उपमहानगरपालिकाको नेतृत्वमा ल्याउन खोजेपछि अहिले विवादले उग्र रुप लिएको छ । जसकाकारण महासेठले एउटा कमिटी र केन्द्रीय सदस्य झाले अर्काे अर्काे कमिटी गठन गरेका छन् ।

मंगलबार एमाले सचिव महासेठ पक्षधरले जनकपुरधाममा अधिवेशन गराएर सुरेन्द्र भण्डारीको नेतृत्वमा ८५ सदस्यीय समानान्तर नगर कमिटी घोषणा गरेका छन् । यसअघि केन्द्रीय सदस्य यदुवंश झाले शुभनारायण मण्डलको अध्यक्षतामा ८५ सदस्यीय नगर कमिटी गठन गरेका थिए ।

सचिव महासेठ पक्षधरको अधिवेशनमा महासेठकी श्रीमती नेतृ जुली महतो प्रमुख अतिथि थिइन् । पूर्वमन्त्रीसमेत रहेकी उनी अहिले पोलिटव्यूरो सदस्य छिन् । उनको पक्षबाट नगर अध्यक्ष बनेका भण्डारी व्यवसायी हुन् ।

यसअघि सोमबार नेता झाले एमाले धनुषा जिल्ला अध्यक्ष राजकिशोर यादवको पहलमा अधिवेशन गराएका थिए । अधिवेशनको प्रमुख अतिथि नेतृ शिला यादव थिइन् । उनको समूहले नगर अध्यक्ष बनाएका मण्डल जनकपुरधाम १३ का वडाध्यक्ष थिए । तर घुसकाण्डमा मुछिएका उनी निलम्बनमा परेका छन् । मुद्दा विचाराधीन रहेको अवस्थामै नेता झा पक्षधरले उनलाई नगर अध्यक्ष बनाइएको हो ।