काठमाडौं। सरकारले सशस्त्र प्रहरी बलका एआईजीपी पुष्पराम केसीलाई महानिरीक्षक (आईजीपी)मा नियुक्त गर्ने भएको छ । आज बस्ने मन्त्रिपरिषद्को बैठकले उनलाई आईजीपीमा नियुक्ति गर्ने तयारी गरेको गृहमन्त्रालय स्रोतको बताएको हो ।

शैलेन्द्र खनाल २७ गते अनिवार्य अवकास पाएका छन् । उनले अनिवार्य अवकासमा पाएसँगै सशस्त्र प्रहरी बल नेतृत्वविहीन बनेको छ । सो अवस्थालाई हेर्दै मन्त्रिपरिषद्को बैठकले बुधबार नै नयाँ नेतृत्व छनोट गर्ने तयारी गरेको हो ।
त्यस्तै, सशस्त्रका डीआईजीहरूको बढुवा गर्न आज बढुवा समितिको बैठक बस्ने स्रोतले बतायो । एआईजी केसी १८ दिनका लागि आईजीपी भएसँगै यता एआईजीको पदसमेत रिक्त हुने छ । सो रिक्त पदका लागि बुधबार बढुवा समितिले बढुवाको तयारी गरेको हो ।

तीन जना डीआईजीहरू राजु अर्याल, नारायणदत्त पौडेल र सिपी गौतमबीच एआईजी बन्ने प्रतिस्पर्धा रहेको देखिन्छ । प्रतिस्पर्धामा रहेका तिनै जना एकै दिन डीआईजीमा बढुवा भएका थिए ।
उनीहरुमध्येबाट नै एक जनालाई एआईजीमा बढुवा गर्ने बढुवा समितिको तयारी रहेको छ । आज उनीहरुमध्ये एक जना एआईजीमा बढुवा हुने छन् ।

स्रोतका अनुसार एआईजीको प्रमुख दाबेदार सिपी गौतम छन् । केही दिनअघि आईजीपीको दौडमा कमजोर देखिएका तेस्रो वरियताका गौतम पछिल्ला दिनमा बलियो भएका छन् । स्रोतका अनुसार गौतमले आफूलाई प्रधानमन्त्री शेरबहादुर देउवा र गृहमन्त्री बालकृष्ण खाँणको साथ रहेको दाबी गरेका छन् ।

नेपाली सेनामा कमाण्ड सम्हालेको आधारमा वरिष्ठता निर्धारण गरिने प्रचलन रहेजस्तो अर्ध सैन्य संरचनाको रुपमा रहेको सशस्त्रमा समेत कमाण्ड गरेका आधारमा वरिष्ठ निर्धारण गर्दा आफू पहिलो नम्बरमा रहेको उनको जिकिर छ । सोही आधारमा अर्याल र गौतमभन्दा आफू वरिष्ठ रहेको उनको दाबी छ ।

१८ दिनपछि उनीहरूमध्येकै एक जनाले सशस्त्र प्रहरीको नेतृत्व सम्हाल्ने हुँदा तीव्र प्रतिस्पर्धा भएको हो । प्रतिस्पर्धामा रहेका अर्याल एक नम्बरमा छन् । पहिलो नम्बरमा भए पनि उनको हकमा दोस्रो नम्बरमा रहेका पौडेल र तेस्रो नम्बरमा रहेका गौतमले चुनौती दिइरहेका छन् ।

अर्याल पहिलो नम्बरमा भएकाले स्वभाविक रुपमा उनको सम्भावना बढी छ । तर, राजनीतिक पहुँचका आधारमा पौडेल र गौतमले अर्याललाई टक्कर दिएका हुन् ।