काठमाडौं । महानगरीय प्रहरी परिसर काठमाडौंमा सरुवा भएर काठमाडौं आउन लागेका प्रहरी उपरिक्षक (एसपी) सानुराम भट्टराई बाटैबाट फर्काइएका छन् । प्रहरी महानिरिक्षक शैलेश थापा क्षेत्रीले एसपी भट्टराईलाई काजमा काठमाडौं प्रहरी परिसर पठाउने निर्णय गरेको थिए तर विवादास्पद पृष्ठभुमी रहेको भन्दै उनको सरुवा रद्ध गरेको उच्च स्रोतको दाबी छ ।

तत्कालिन प्रधानमन्त्री केपी शर्मा ओलीको पिएसओ रहेका भट्टराई एसपीमा बढुवा भएपछि झापामा पुगेका थिए । केपी ओलीकै पालामा बढुवा भएको र ओलीकै जिल्लामा सरुवा भएका उनलाई काठमाडौं पठाउने निर्णय गरेको थियो तर उनि केपी ओली निकट रहेको भन्दै काठमाडौं परिसर आउनुपुर्व उनको सरुवा रद्ध गरिएको हो ।

काठमाडौं प्रहरी परिसरमा हाल एसपी दिनेशराज मैनाली कार्यरत छन् । मुद्दाको चाप बढी हुने र अप्रेशनको काम पनि धेरै हुने भएकाले एक जना एसपीले मात्रै हेर्न नभ्याउने भएकाले दुई जना एसपी राख्न लागिएको थियो ।

सोही अवस्थालाई मध्यनजर गर्दै भट्टराईलाई काठमाडौं पठाउने निर्णय गरिएको थियो तर केपी ओली निकट रहेको भन्दै उनलाई काठमाडौं आउनुअगावै काज रद्द गरिएकाे स्रोतको दावी छ । उनको ठाउमा अरुलाई नै ल्याउने कसरत जारी छ ।