वालिङ । स्याङ्जाको वालिङ नगरपालिका १२ डाँडाखर्कमा जीप दुर्घटना हुँदा ५ जनाको मृत्यु भएको छ । विहान साँढे १० बजे जीप दुर्घटनामा परेको हो ।

जीपमा सवार ११ मध्ये ४ जना घाइते भएको वडा प्रहरी कार्यालय वालिङमा कार्यरत एक प्रहरीले जानकारी दिए । दुर्घटनामा परी ५ जनाको मृत्यु भएको प्रहरीको भनाई छ ।

२ जनालाई उपचारका लागि पोखरा रिफर गरिएको छ ।

घटनास्थलमा रहेका पत्रकार प्रकाश डुम्रेका अनुसार, गाडी फिरफिरे स्कुल यताको माथिल्लो सडकबाट तल्लो सडकमा पछारिएर खरबारीमा पुगेको थियो ।

तल्लो सडकबाट झण्डै १०० मिटर तल खरबारीमा गाडी चिलाउनेको रुखमा अड्किएको छ ।

घटनाबारे पत्रकार प्रकाश डुम्रे भन्छन् :-

केही दिन यता गाउँमा नै भएकोले घटना घटेको ७/८ मिनेटमा दुर्घटनास्थलमा पुगेको थिए । घटनास्थल पुग्दा घाइतेको रुंवाबासी थियोे,घाइते छट्पटी रहेका थिए । कतै पानी- पानी कतै बचाउ- बचाउ भनिरहेका थिए ।

सबै चिनेका दाईहरु भाउजुहरुको अनुहार छ । घटनास्थलबाट प्रहरी लाई खबर गरे,एम्बुलेन्सलाई खबर गरे,वालिङ,झोलुङ्गे,बायाँटारी सबै तिर एम्बुलेन्सलाई फोन गरेर झण्डै ४५ मिनेट पछि यताउता सबै जुट्नु भयो । गाडी फिरफिरे स्कुल यताको माथिल्लो सडकबाट तल्लो सडकमा पछारिएर खरबारीमा पुगेको थियो ।

तल्लो सडकबाट झण्डै १०० मिटर तल खरबारीमा गाडी चिलाउनेको रुखमा अड्किएको छ ।

रगता्मय शरीर । कोहीको टाउकोमा,कोहीको अनुहारमा,कोहीलाई शरिरका विभिन्न भागमा चोट लागेको छ । अहिले सबैलाई निकालेर वालिङ स्वास्थ चौकी पठाईएको छ । गाडीमा ११ जना सबार हुनुहुन्थ्यो,गाउँकै गाडीमा वालिङ बजार जान हिडेका केही दाईहरुलाई गुमाएका छौँ । केहीको उपचार चलिरहेको छ ।

(यसअघि प्रकाशित समाचारमा असावधानीवश मृतकको संख्या ७ हुन गएकोमा गम्भिर क्षमायचना गर्न चाहान्छौं । सम्पादक)