काठमाडौँ । कोरोना भाइरसका कारण भारतमा थप २५ सय संक्रमित भएका छन् । सोही अवधिमा ३३ जनाको मृत्यु भएको छ ।

सरकारी अधिकारीले शनिबार दिएको जानकारीअनुसार पछिल्लो २४ घण्टामा दुई हजार ५२७ जना कोरोनाबाट संक्रमित भएका हुन ।

संघीय स्वास्थ्य मन्त्रालयले दैनिक संक्रमित र मृतकको संख्या पछिल्ला दिनमा बढ्दै गइरहेको जनाएको छ ।

यसअघि शुक्रबार सार्वजनिक भएको विवरणमा दुई हजार ४५१ जना संक्रमित भएको देखिएको थियो । मृतकको संख्या शनिबारभन्दा बढी ५४ रहेको थियो ।

पछिल्लो एक दिनमा एक हजार ६५६ जना कोरोना भाइरसबाट संक्रमणमुक्त भएका छन् । एउटै अवधिमा नयाँ संक्रमितभन्दा संक्रमणमुक्त भएकाको संख्या धेरै रहेकाले सक्रिय संक्रमितको संख्या भने घट्दै गएको छ ।

मन्त्रालयका अधिकारीले दिएको जानकारीअनुसार भारतमा अहिले संक्रमित अवस्थामै रहेकाको संख्या १५ हजार ७९ रहेको छ ।