काठमाडौं । तारा एयरले दुर्घटनाग्रस्त अवस्थामा जहाज भेटिएकोप्रति स्तब्ध भएको जनाएको छ। सोमबार एक विज्ञप्ति जारी गर्दै तारा एयरले जहाज दुर्घटनाग्रस्त अवस्थामा फेला परेको भन्दै दु: ख व्यक्त गरेको हो। सोमबार बिहानैदेखि हवाई तथा स्थलमार्गबाट खोजी गर्दा जहाज दुर्घटनाग्रस्त अवस्थामा भेटिएको हो।

आइतबार बिहान पोखराबाट जोमसोम उडेको तारा एयरको ९ एन एईटी जहाज मुस्ताङको घोडेपानीबाट जोमसोम टावरसँग अन्तिमपटक सम्पर्क भएको थियो।

तर तारा एयरले जहाज दुर्घटनाग्रस्त अवस्थामा १४ हजार ५०० फिटको उचाइमा मुस्ताङको थासाङ गाउँपालिका वडा नम्बर २ को सानुसरे भीरमा भेटिएको जनाएको छ। जहाजमा ३ जना चालक दलका सदस्य र १९ यात्रु गरी २२ जना थिए।

दुर्घटनामा परी मृत्यु भएकाहरूको उद्धारका लागि तीन जना नेपाली सेना र चार जना स्थानीयको टोलीले उद्धार कार्य जारी छ । अहिलेसम्म १६ जनाको उद्धार भएको नेपाल नागरिक उड्यन प्राधिकरणले जनाएको छ ।