काठमाडौँ । नेपाल प्रहरीले बैंकिङ कसुरमा फरार दुई महिला पक्राउ गरेको छ । प्रहरीको केन्द्रीय अनुसन्धान ब्यूरो (सीआईबी)को टोलीले आफ्नो खातामा पर्याप्त रकम नहुँदा झुक्याएर चेक दिएर बैंकिङ कसुर गर्ने दुई जनालाई पक्राउ गरेको हो ।

पक्राउ पर्नेमा सुनसरी घर भई काठमाडौँको बानेश्वर बस्ने ४२ वर्षीय कविता सुब्बा र सिन्धुपाल्चोक घर भई काठमाडौँको बानेश्वर बस्ने ३९ वर्षीय लिना श्रेष्ठ गिरी रहेका छन् ।

ब्यूरोका प्रवक्ता प्रहरी उपरीक्षक श्यामकुमार महतोले जाहेरवालालाई झुक्यानमा पारेर खातामा रकम नभएको चेक दिई बैंकिङ कसुरजन्य अपराध गरेकाले उनीहरूलाई पक्राउ गरेको बताए ।

उच्च अदालत पाटनले पक्राउ परेकी सुब्बालाई विसं २०७६ फागुनमा १५ दिन कैद सजाय र ५० लाख जरिवाना गरेको थियो । यस्तै, गिरीलाई विसं २०७६ माघमा १५ दिन कैद सजाय र ५४ लाख ५० हजार जरिवाना हुने फैसला गरेको थियो ।

अदालतले उनीहरुलाई बैंकिङ कसुर तथा सजाय ऐन, २०६४ बमोजिम कैद र सजाय हुने फैसला सुनाएको थियो ।