काठमाडौँ । पूर्वप्रधानमन्त्री तथा नेकपा एकीकृत समाजवादीका नेता झलनाथ खनालले प्रधानन्यायाधीश चालेन्द्र शमशेर जबराविरुद्धको महाअभियोग प्रस्ताव तुरुन्त पास गर्न नल्याइएको बताएका छन् ।

बुधबार प्रतिनिधिसभा बैठकमा सहभागी भएर बाहिरिने क्रममा नेता खनालले प्रधानन्यायाधीश जबराविरुद्धको महाअभियोग प्रस्ताव तुरुन्त पास गर्न नल्याइएको स्पष्ट पारेका हुन् । उनले प्रस्ताव दर्तापछि परिस्थिति हेर्दै क्रमशः टुंगोमा पु¥याउन महाअभियोग लगाइएको बताए ।

‘यो प्रस्ताव तुरुन्त पास गर्न राखेकै होइन नि, यो प्रस्तावअगाडि आएको छ, यसलाई विस्तारै प्रस्ताव राखिसकेपछि परिस्थिति हेर्दै जाने अनि क्रमशः एउटा टुंगोमा पु¥याउने कुरा हो नि त, त्यसकारण समय अझै छ,’ उनले भने, ‘समिति गठन भएको छ, समितिले माग गर्नुप¥यो नि त, त्यो समितिको के उत्तरदायित्वको निम्ति, के कार्यभारको निम्ति त्यो समिति गठन भएको हो, अनि संसदले काम गर्नुप¥यो, त्यसपछि त अगाडि बढिहाल्छ नि ।’

नेता खनालले महाअभियोग प्रस्तावको सम्बन्धमा संसदले गठन गरेको समितिले आफ्नो उत्तरदायित्व र जिम्मेवारी पूरा गर्नु पर्ने बताए ।