काठमाडौँ । अखिल क्रान्तिकारीका पूर्व अध्यक्ष तथा नेकपा माओवादी केन्द्रका नेता लेखनाथ न्यौपानेले त्रिभुवन विश्वविद्यालयमा लागेको तालाबन्दीलाई लिएर प्रधानमन्त्रीसँग प्रश्न गरेका छन् । गत माघदेखि विश्वविद्यालयमा तालाबन्दी हुँदा कुलपतिसमेत रहेका प्रधानमन्त्री मौन बस्न नुहने बताए ।

‘हामीले पढेको विश्वविद्यालय भनेर गर्व गर्ने गरिएको त्रिभुवन विश्वविद्यालय परिसरमा आज पुग्दा र त्यहाँका शिक्षक एवं प्रशासनसँग छलफल गर्दा आँखाबाट तपतप आँसु झर्यो, माघदेखि विश्वविद्यालयमा तालाबन्दी छ, न तालाबन्दी गर्ने पक्ष जिम्मेवार छ, न विश्वविद्यालय प्रशासन, न त सरकार नै,’ दुःख व्यक्त गर्दै उनले आफ्नो सामाजिक सञ्जाल फेसबुकमा लेखे ।

नेता न्यौपानले प्रधानमन्त्री कुलपति भएको विश्वविद्यालयमा प्रधानमन्त्रीकै पार्टीका विद्यार्थी संगठनले तालाबन्दी गर्दा लाचार र बेमतलबी ढंगले बसेको आरोप लगाए । ‘बेमतलबी ढंगले गरेको तालाबन्दीलाई चासोका साथ सम्बोधन गर्न नसक्ने लाचार कुलपतिले बोल्नु पर्दैन ? कार्यकारी जिम्मा पाएका उपकुलपतिले विश्वविद्यालय संचालन गर्नु पर्दैन ? शिक्षक भर्तीमा मन लाग्दी छ, परीक्षामा ढिलासुस्ती मात्र होइन, अविश्वसनीयता र अपारदर्शीता संगठित भइरहेको लाजको विषयको जिम्मा लिने कसले हो ?,’ उनले भने ।

उनले एक विश्वविद्यालयको विज्ञान संकायका डिनले झरीमा रुज्दै कागज पत्रमा हस्ताक्षर गरेको दृश्यले देशको पुरानो र ठूलो विश्वविद्यालयको हालत झल्काएको बताए ।