काठमाडौं । सरकारले कोभिड १९ विरुद्धको खोप लगाउन छुटेका पाँचदेखि ११ वर्षसम्मका बालबालिकालाई साउन २ गतेदेखि फाइजर खोप दिने भएको छ । स्वास्थ्य तथा जनसंख्या मन्त्रालयले २७ जिल्लाका बालबालिकालार्इ दोस्रो डोजसँगै छुटेकाहरूलाई पनि साउन २ गतेदेखि पहिलो डोज खोप दिन लागिएको हो ।

कोभ्याक्स सुविधामार्फत अमेरिकी सरकारको सहयोगमा आईतबार आइपुगेको २२ लाख ९९ हजार २०० डोज खोप बालबालिकालाई दिन लागिएको स्वास्थ्य सेवा विभाग आपूर्ति शाखाका प्रमुख सुरेन्द्र चौरासियाले जानकारी दिए । असार ९ गतेदेखि १५ असारसम्म पहिलो डोज २७ जिल्लामा दिइएको थियो । भने दोस्रो डोज साउन २ देखि ८ गतेसम्म दिइने छ ।
बाँकी ५० जिल्लामा भने भदौ ५ देखि ११ गतेसम्म पहिलो र भदौ २७ देखि असोज १ गतेसम्म दोस्रो डोज खोप दिइने विभागले जनाएको छ ।