काठमाडौँ । गत वैशाख ३० गते सम्पन्न स्थानीय तहको निर्वाचनमा एउटा मतका लागि २८४ रुपैयाँ खर्च भएको निर्वाचन आयोगले जनाएको छ ।

चुनावमा निर्वाचन आयोगले गरेको खर्चलाई मतदाताको संख्याले भाग गर्दा एउटा मतको मूल्य २८४ हुन पुगेको हो । यसबाहेक निर्वाचनमा सुरक्षा तथा राजनीतिक दल र उम्मेदवारले गरेको खर्च जोडिएको छैन ।

निर्वाचन आयोगका प्रमुख निर्वाचन आयुक्त दिनेशकुमार थपलियाले २०६४ सालयताकै सबैभन्दा कम खर्चिलो निर्वाचन भएको बताए । उनले गत वैशाखमा सम्पन्न निर्वाचन अघिल्लो निर्वाचनको तुलनामा करिब दुई अर्ब कम खर्च भएको दाबी गरे ।

स्थानीय तहको निर्वाचनमा आयोगले कूल पाँच अर्ब चार करोड रुपैयाँ खर्च गरेको थियो । चुनावमा एक करोड ७७ लाख मतदातामध्ये एक करोड २५ लाखले मात्र मतदान गरेका थिए ।

निर्वाचन केन्द्रका हिसाबले प्रति मतदान केन्द्रमा दुई लाख २९ हजार रुपैयाँ खर्च भएको आयोजले जनाएको छ ।