काठमाडौँ । जंगली च्याउ खाँदा उत्तरी रसुवाको पुरानो तातोपानी क्षेत्रमा ११ जना बिरामी भएका छन् ।

जिल्ला अस्पताल धुञ्चेका मेडिकल अधिकृत डा. निरज फोजुका अनुसार जंगली रातो च्याउ खाई बिरामी परेका ११ जनामध्ये चार जना गम्भीर रहेकाले थप उपचारार्थ सबैलाई त्रिशुली अस्पताल रिफर गरिएको छ ।

उपचारका लागि आज अपराह्न अस्पताल आएका बिरामी लमजुङ तथा रसुवाका रहेको तर उनीहरूले यहाँ के काम गरेको भन्नेबारे एकीन नभएको डा. फोजुले बताए ।

तरकारीको रूपमा उपयोग गरिने पहिचान नभएका च्याउलगायत कुनै चीज नखान चिकित्सकले सबैमा अनुरोध गरेका छन् ।