काठमाडौँ । नेकपा माओवादी केन्द्रका प्रवक्ता कृष्णबहादुर महराले पार्टीको पदाधिकारी टुंगो लगाउन कठिन भएको बताएका छन् । पार्टीको निकट प्रेस सेन्टरको पदाधिकारीलाई प्रमाण पत्र वितरण गर्दै उनले यस्तो बताएका हुन् ।

‘हामीलाई पदाधिकारी टुंगो लगाउन धौ–धौ भयो, आज टुङ्ग्याउने भन्ने थियो, अझै मिलेको छैन,’ प्रवक्ता महराले भने, ‘आजको बैठक सर्यो, अब २५ गतेको बैठकमा के हुन्छ ।’

आज दिउँसो पार्टी कार्यालय पेरिसडाँडामा बसेको माओवादी स्थायी कमिति बैठक स्थगित भएको थियो । संसद बैठक र अर्थमन्त्रीको सपथका कारण बैठक स्थगित भएको हो ।

आगामी बैठक पार्टी अध्यक्ष पुष्पकमल दाहाल ‘प्रचण्ड’ जापान भ्रमण गरी फर्केपछि मात्रै बस्ने माओवादी केन्द्रीय कार्यालयले जनाएको छ ।